Fréttir

Í Egilsstaðaskóla eru 2 umsjónardagar á skólaárinu en markmið þessara daga er að æfa samvinnu og styrkja hópa og þannig auka samkennd meðal barnanna. Í dag var seinni umsjónardagurinn og um allan skóla hafa verið unnin fjölbreytileg verkefni, m.a. úr kennsluefni frá Vöndu Sigurgeirsdóttur og KVAN. Verkefni sem gengu út á að byggja brýr, finna út styrkleika sína, hrósa sessunaut sínum, vera í slökun, leysa þrautir með Breakout, dansa og margt fleira. Einhverjir árgangar fóru á skauta og grilluðu pylsur þrátt fyrir að úti væri talsvert rigning. Það getur reynt á að koma sér saman um leiðir til að leysa þrautir og með slíkum verkefnum þjálfast krakkarnir í samvinnu. Það þarf að hlusta á félagana og komast að sameiginlegri niðurstöðu. Þess vegna er mikilvægt að þjálfa börnin í að takast saman á við áskoranir því þannig eflast þau, öðlast betri skilning á sjálfum sér og félögunum og kynnast nýjum hliðum á bekkjarfélögum sínum.

Stjórnendur og starfsfólk Egilsstaðaskóla óskar nemendum, foreldrum og forsjáraðilum þeirra og velunnurum skólans gleðilegs nýs árs með kærri þökk fyrir liðið ár. Kennsla hefst skv. stundaskrá mánudaginn 5. janúar.

Það er að færast jólablær yfir skólann, nemendur og starfsfólk. Ýmis verkefni eru í gangi; yngri nemendur eru að pakka inn jólagjöfum til foreldra, lita jólamyndir, reikna og skrifa sögur. Það er búið að búa til ýmiskonar jólaskraut og jólakötturinn er sjáanlegur víða. Á bókasafninu er jólabókaklúbbur og nemendur og starfsfólk hafa hengt upp köngla í stofur og á bókasafni, sem tákna hverja lesna bók. Á fimmtudaginn er jólaskemmtun elsta stigs og þangað er 7. bekkingum boðið sem gestum. Sú skemmtun stendur frá kl. 19.00 til 22.00. Í 1. - 6. bekk koma nemendur í skólann kl. 10.00 á föstudaginn, hlusta á jólasögu, halda stofujól og dansa svo kringum jólatréð. Skóladegi þeirra lýkur klukkan 11.30.

Undanfarnar vikur hafa krakkarnir í 6. bekk verið í PALS, sem er lestraraðferð sem byggir upp færni nemenda í lestri og lesskilningi. Aðferðin byggir á því að nemendur vinna saman í pörum og aðstoða hvor annan við að bæta lesturinn. Pörin nota stigakerfi sem hvatningu og gefa sér stig m.a. fyrir að ljúka verkefnum. Kennari fylgist með pörunum og aðstoðar eftir þörfum. Rannsóknir sýna að PALS bætir bæði lestrarfærni og lesskilning hjá þeim nemendum sem fara í gegnum PALS ferlið. Það byggir undir bættan lesskilning hjá nemendum og þar með bættan námsárangur. Í tilefni af því að PALS er lokið í bili hjá 6. bekk héldu þau PALS-lokahátíð, spiluðu bingó og fengu kakó. Það lagðist vel í krakkana og þau áttu notalega stund.

Það er hefð í Egilsstaðaskóla að fagna fullveldisdeginum 1. desember með stuttri dagskrá. Allir nemendur og starfsfólk skólans kom saman í matsal og hlýddu á ávörp, sögulestur og sungu svo saman í tilefni af Degi íslenskrar tónlistar. Fólk var sparibúið og hátíðarbragur yfir öllu. Berglind Karlsdóttir umsjónarkennari í 1. bekk flutti ávarp fyrir hönd starfsfólks, Árni Stefán Ólafsson formaður Nemendaráðs talaði fyrir hönd nemenda og tveir nemendur í 7. bekk, þau Styrmir Vigfús Guðmundsson og Birgitta Ósk Borgþórsdóttur lásu upp úr Dæmisögum Esóps. Í lokin voru sungin þrjú lög og eftir það héldu nemendur og starfsfólk aftur til sinna starfa.

Mikilvægur þáttur í þróun skólastarfs er innra mat en samkvæmt lögum um grunnskóla ber öllum grunnskólum að meta starf sitt með reglubundnum hætti. Innra mat Egilsstaðaskóla er viðamikið og tekur til margra þátta í skólastarfinu. Kannanir Skólapúlsins eru lagðar fyrir nemendur í 2. – 10. bekk, allt starfsfólk og úrtak foreldra & forsjáraðila. Auk þess eru reglulega lagðar fyrir aðrar kannanir s.s. Íslenska æskulýðsrannsóknin og Ungt fólk. Í skýrslunni er gerð grein fyrir þróunarstarfi sem fer fram innan skólans en þar ber helst að nefna innleiðingu á Heillaspori, leiðsagnarnámi og Uppeldi til ábyrgðar. Skólinn hlaut í vor vottun frá Háskólanum á Akureyri á því að vera Byrjendalæsisskóli. Leitast er við að draga fram styrkleika og veikleika í skólastarfinu. Útfrá greiningu á veikleikum er lögð fram úrbótaáætlun sem tekur til yfirstandandi skólaárs. Auk þess er mat á úrbótaáætlun fyrra árs. Skólastarf er í stöðugri þróun og því er mikilvægt að meta það með kerfisbundnum hætti þannig að hægt sé að bregðast við ef veikleikar koma fram í einhverjum þáttum. Matsskýrslan hefur verið kynnt fyrir Fjölskylduráði Múlaþings, skólaráði Egilsstaðskóla og fyrir starfsfólki. Hún er aðgengileg undir tenglinum Skólinn; Mat á skólastarfi.

Einn þáttur í umfjöllun um mannslíkamann í 9. bekk er krufning innyfla úr sauðfé og nautgripum. Þetta er mikilvægur þáttur í að gera sér grein fyrir starfsemi líffæranna. Þetta reynist sumum meiri áskorun en öðrum en nær öllum finnst þetta fróðlegt og lærdómsríkt. Nokkrar myndir fylgja af vettvangi.

Í liðinni viku settu nemendur á elsta stigi söngleikinn The Greatest Showman eða Sýningarstjórann á svið á fyrstu árshátíð skólaársins. Krakkarnir hafa unnið að undirbúningi síðan í september en það felur í sér leikæfingar, söngþjálfun, sviðsmyndagerð, hljóð- og ljósastjórn. Stór hópur nemenda og starfsfólk kemur að uppsetningu sem þessari enda er þetta viðamikil sýning. Hrefna Hlín Sigurðardóttir kennari þýddi söngleikinn The Greatest Showman og leikstýrði krökkunum. Kennarar í Tónlistarskólanum á Egilsstöðum aðstoðuðu við söngþjálfun og myndmenntakennari stýrði leikmyndagerð auk stuðningsfulltrúa á elsta stigi sem aðstoðuðu við undirbúning og leikstjórn. Það er alltaf gaman að fylgjast með krökkunum eflast og styrkjast í æfingaferlinu og margir sigrar vinnast á leiðinni. Lokapunkturinn, sýningin sjálf, er uppskera margra vikna vinnu og það var auðséð í lok sýningar hve glöð og stolt krakkarnir voru af sýningunni. Fullur salur áhorfenda fagnaði þeim vel í lokin.