Fréttir

Um 100 börn sviðsettu söguna um Línu langsokk á árshátíð 3. og 4. bekkjar í síðustu viku. Það var mikið fjör og krakkarnir stóðu sig með mikilli prýði. Að venju þarf að sinna ýmsum verkefnum, ekki aðeins að leika og syngja heldur líka hanna og gera sviðsmynd, stjórna ljósum og hljóði, setja saman búninga og öll þau verkefni sem fylgja því að setja upp leiksýningu. Myndirnar segja meira en mörg orð. Sumir myndirnar eru teknar af Unnari Erlingssyni og við þökkum honum kærlega fyrir að fá að birta þær hér.

Krakkarnir í 5. bekk buðu forráðafólki sínu á sýningu á áhugasviðsverkefnum sem þau hafa unnið að undanfarið. Verkefnin voru mjög fjölbreytt og gaman að sjá hvað krakkarnir höfðu lagt mikinn metnað í þau. Sem dæmi um verkefni má nefna Grænland, nefapa, ísbirni, sveitina, fræga íþróttamenn, íþróttafélagið Hött og margt fleira. Meðfylgjandi eru myndir af hluta verkefnanna og krökkunum.

Margir telja öskudaginn besta dag ársins, bæði börn og fullorðnir og það sýndi sig vel í morgun þegar skólastarfið hófst. Flestir koma í einhvers konar búningum og sumir hafa lagt mikinn metnað í gervin sín. Það er alltaf gaman að ganga um skólann og sjá hvað börn og fullorðnir njóta dagsins en á dagskránni er samvera vinabekkja, samvera árganga og stiga og samkoma í íþróttahúsinu fyrir nemendur í 1. - 5. bekk sem er skipulögð af Foreldrafélagi Egilsstaðaskóla. Skóladegi lýkur um hádegi og þá hefst vetrarfrí sem er eflaust kærkomið fyrir nemendur og starfsfólk.

Krakkarnir í 4. bekk hafa verið að læra um landnámið á Íslandi undanfarnar vikur. Hvert og eitt valdi sér landnámsmann og öfluðu upplýsinga um hann. Þau gerðu kort af Íslandi og gerðu knörr fyrir hvern landnámsmann sem þau staðsettu á þeim stöðum þar sem þeir námu land. Bekkurinn fékk Baldur Pálsson í heimsókn en hann er Austurlandsgoði og sagði krökkunum frá landnáminu og heiðnum sið. Þau voru mjög spennt að fá goða í heimsókn og eitt barnanna spurði kennarann hvar hann hefði fundið landnámsmann. Í lokin kynntu krakkarnir landnámsmennina sína hvert fyrir öðru.

Nemendur á miðstigi héldu árshátíð sína á dögunum. Krakkarnir settu Söguna af bláa hnettinum á svið en sagan fjallar um börn sem búa langt úti í geimnum og fullorðnast ekki. Til þeirra kemur vera sem umturnar áhyggjulausu lífi og fer með þau í hættulegt ferðalag. Í sýningunni er mikið sungið og mikið fjör. Að sýningunni komu um 120 nemendur, sem auk þess að leika og syngja undirbjuggu leikmynd, stjórnuðu hljóði og ljósum og voru sviðsmenn. Umsjónarkennarar 5. - 7. bekkjar sáu um undirbúning sýningarinnar en æfingar hófust í janúar. Tónlistarkennarar og tónlistarnemar í Tónlistarskólanum á Egilsstöðum önnuðust tónlistarflutning á sýningunni og færum við þeim innilegar þakkir fyrir samstarfið.

Í dag fengu nemendur í 6.bekk góða heimsókn. Fyrrum nemandi skólans, Áslaug Munda Gunnlaugsdóttir, er í stuttri heimsókn hjá fjölskyldu sinni. Það þekkja margir til Áslaugar Mundu en hún hefur spilað fótbolta lengi og hefur á síðustu árum verið valin í landslið Íslands, nú síðast í A-landslið kvenna sem spilaði í Frakklandi fyrir skömmu. Áslaug Munda sagði krökkunum frá ýmsu í tengslum við fótboltann og námið í taugavísindum, sem hún stundar núna við Harvard háskóla í Bandaríkjunum. Eysteinn Hauksson, umsjónarkennari og fótboltaþjálfari og Áslaug Munda spjölluðu við krakkana um hve mikilvægt er að setja sér markmið og leggja vinnu í að ná þeim. Í tilfelli Áslaugar Mundu hefur hún þurft að leggja hart að sér til að ná árangri, bæði í fótboltanum og í náminu. Það hefur skipt miklu fyrir hana að nálgast verkefnin með jákvæðu hugarfari og nú leggur hún áherslu á að ljúka náminu í Harvard. Krakkarnir tóku Áslaugu Mundu mjög vel eins og myndirnar sýna og margir fengu eiginhandaráritun hjá þessari flottu knattspyrnukonu.