Fréttir

Egilsstaðaskóla var slitið í 77. sinn þann 6. júní sl. Nemendur í 1. - 9. bekk mættu í skólann, hlýddu á ávarp skólastjóra og tóku svo við vitnisburði frá umsjónarkennurum. Nemendur í Tónlistarskólanum á Egilsstöðum fluttu tónlistaratriði. Um kvöldið voru útskrifaðir 38 nemendur úr 10. bekk. Við þá athöfn voru flutt ávörp og afhentir vitnisburðir. Nokkrir nemendur fengu viðurkenningar fyrir góða frammistöðu í námi og fyrir dugnað, framfarir, prúðmennsku og þátttöku í félagslífi nemenda. Fulltrúar útskriftarnema ávörpuðu 10. bekkjarteymið og færðu þeim gjafir. Hljómsveit skipuð nemendum í 10. bekk flutti tvö lög og í lokin stigu krakkarnir dans en í vetur hafa þau æft sig í að dansa gömlu dansana. Þannig kvöddu þau skólann eftir 10 ára skólavist með skottís og "Hæll tá".

Krakkarnir í 2. bekk buðu á sýningu á verkum sem þau unnu í tengslum við lestur á sögunni Blómin á þakinu. Efniviður bókarinnar var nýttur í margvísleg verkefni, sem voru meðal annars samþætt við list- og verkgreinar. Á sýningunni komu foreldrar og krakkarnir sýndu þeim afurðirnar með stolti, lásu sögurnar sínar og sögðu frá verkefnunum. Blómin sem þau sáðu eiga vonandi eftir að vaxa og dafna í sumar til minningar um skemmtilegt verkefni.

Nemendur í 4. bekk héldu Litlu upplestrarkeppnina í blíðskaparveðri í síðustu viku. Undanfarnar vikur hafa krakkarnir æft sig að lesa upp enda er markmið keppninnar - sem reyndar er alls ekki keppni - að þjálfa upplestur og framkomu. Litla upplestrarkeppnin er nokkurskonar undanfari Stóru upplestrarkeppninnar sem er haldin í 7. bekk ár hvert. Umsjónarkennarar árgangsins ákváðu að flytja keppnina í Tjarnargarðinn þar sem það var einmuna blíða og bæði lesarar og gestir nutu þess að vera úti.

Á hverju vori gera nemendur í 10.bekk lokaverkefni. Krakkarnir ákveða viðfangsefni og hafa ákveðinn tíma til að vinna við verkefnið og ljúka því. Vinnuferlið er skipulagt og reglulega hitta nemendur kennara til að gera grein fyrir stöðu verkefnisins. Í ár voru verkefnin mjög fjölbreytt; smíðaverkefni, listræn verkefni, fræðsluefni, tölvuleikjahönnun og ýmislegt fleira eins og myndirnar sýna. Það er alltaf mjög ánægjulegt að fylgjast með nemendunum sýna verkefnin sín enda full ástæða fyrir þá að vera stolt af því sem hefur áunnist.

Krakkarnir í 3ja bekk nutu góðviðris á fjörðunum í vikunni. Hópurinn skoðaði Safnahúsið á Norðfirði þar sem var margt spennandi að sjá. Síðan var farið yfir á Mjóeyri þar sem krakkarnir borðuðu nesti og léku sér svo í fjörunni. Þar fundust ýmsar gersemar, t.d. marflær og lokaðar skeljar sem var gaman að gægjast í. Hundurinn Skotta sló í gegn á Mjóeyri en hún fékk að smakka á nestinu hjá krökkunum og lék svo við þau.

Árlega kjósa börn þær bækur sem þeim þykja skemmtilegastar, áhugaverðastar eða bestar. Í ár fengu 128 bækur kosningu en kosið var á almennings- og skólabókasöfnum um allt land. Um 100 nemendur í Egilsstaðaskóla tóku þátt í kosningunni. Eftirfarandi bækur lentu í topp 10 sætunum hjá börnunum og eru hér í stafrófsröð. Bekkurinn minn - Hendi! - Textahöfundur Yrsa Þöll Gylfadóttir, myndhöfundur Iðunn Arna. Dagbók Kidda klaufa : ekkert mál eftir Jeff Kinney, þýðing: Helgi Jónsson Hundmann : óbyggðirnar kvabba - eftir Dav Pilkey í nafni Georgs Skeggjasonar og Haralds Hugasonar, þýðing: Sigurgeir Orri Sigurgeirsson Iceguys eftir Heiðu Björk Þórbergsdóttur ; flestar ljósmyndir: Ester Magnúsdóttir Kærókeppnin eftir Emblu Bachmann, myndlýsing: Blær Guðmundsdóttir. Lára fer á fótboltamót eftir Birgitta Haukdal, myndlýsing: Anahit Aleksanian og Elen Sargsyan Orri óstöðvandi -heimsfrægur á Íslandi eftir Bjarna Fritzson, myndlýsing: Þorvaldur Sævar Gunnarsson Ronaldo er frábær eftir Simon Mugford, hönnuður og myndlýsing Dan Green, þýðing: Guðni Kolbeinsson Stella segir bless! eftir Gunnar Helgason, kápumynd Rán Flygenring Sveindís Jane - saga af stelpu í landsliði eftir S. Norðfjörð og Sveindísi Jane Jónsdóttur, myndlýsing: Elena Yalcin

Undanfarið hafa nemendur í 5. bekk kynnt sér heimingeiminn og ýmislegt sem þar er að finna. Krakkarnir hafa fræðst um veðurhvolt, miðhvolf, geimferðir, loftsteina og margt margt fleira. Þau gerðu sér líkön af himingeimnum og héldu sýningu fyrir gesti af leikskólanum. Myndirnar sýna hversu fjölbreyttar útfærslurnar urðu.

Í vikunni voru þemadagar í Egilsstaðaskóla. Viðfangsefni krakkanna voru fjölbreytt og unnin bæði innan skólans og utan. Á miðstigi gerðu nemendur sér fjársjóðskistur sem þau söfnuðu í hlutum sem skiptu þau máli. Þau gerðu einnig sólir sem sýndu hvað fær þau til að skína. Einlægni og þakklæti einkenndi þessi verkefni og það var einstakt að sjá hversu fjölbreyttar fjársjóðskisturnar voru. Í þeim mátti m.a. sjá handprjónaðar peysur, fyrstu skóna, verðlaunapeninga, myndir af látnum gæludýrum, tyggjópoka, vegabréf og margt margt fleira. Níundi bekkur heimsótti stríðsárasafnið á Reyðarfirði og brugðu sér svo yfir á Eskifjörð. Áttundi bekkur hannaði spil frá grunni og foreldrum var svo boðið að koma og skoða og spila spilin. Gaman að sjá foreldra og börn leika sér saman við fjölbreytta spilamennsku. Á yngri stigum var farið í ýmsar vettvangsferðir og fræðst um heimahagana. Veðrið lék við nemendur og starfsfólk þessa daga sem voru hressandi uppbrot nú þegar styttist mjög í skólalok.

Það standa yfir þemadagar í Egilsstaðaskóla. Krakkarnir vinna að fjölbreyttum verkefnum sem tengjast þeim sjálfum og nærumhverfinu. Á miðstigi eru allir að búa sér til fjársjóðskistu sem inniheldur hluti sem skipta hvern og einn máli og lætur þeim líða vel. Krakkarnir gera líka sólir sem sýna hvað lætur þau skína. Inn á milli er svo útivist og leikir. Krakkarnir í 1. bekk fóru á Vilhjálmsvöll og krakkarnir fræddust um Vilhjálm Einarsson, ólympíufara og síðar skólameistara ME. Þau teiknuðu myndir og skrifuðu texta. Krakkarnir voru mjög stolt af myndunum sínum og voru áhugasöm um að sýna þær. Þriðjubekkingar bökuðu múffur til að taka með í nesti í gönguferð í Sigfúsarlund á morgun og fóru líka í myndatöku. Framhald er á þemadögum á miðvikudag.