Fréttir

Fjör og fræði fyrir allt samfélagið Háskólalestin heldur austur á bóginn í lok apríl og verður með vísindaveislu á Egilsstöðum dagana 28. til 30. apríl. Austfirðingum er boðið upp á fjölbreytta dagskrá fyrir alla fjölskylduna. * Heimsóknin hefst þriðjudaginn 28. apríl þegar boðið verður upp á kennarasmiðjur fyrir kennara á svæðinu. Þar er lögð áhersla á faglega þróun og að veita kennurum innblástur sem nýtist í skólastarfi. * Miðvikudaginn 29. apríl taka nemendur í 7.–10. bekk Egilsstaðaskóla þátt í spennandi námskeiðum. Nemendur sitja alls þrjú námskeið yfir daginn og kynnast fjölbreyttum sviðum vísinda og fræða á líflegan hátt. Í boði eru meðal annars námskeið tengd stjörnufræði, eðlisfræði, skurðlækningum, jarðfræði, íþrótta- og heilsufræði, blaða- og fréttamennsku, japönskum fræðum, tæknisköpun og skapandi sjálfbærni. * Fimmtudaginn 30. apríl kl. 16–18 verður Opið vísindahús í Egilsstaðaskóla þar sem fólk á öllum aldri er hjartanlega velkomið í vísindagleði fyrir alla fjölskylduna. Þetta er kjörið tækifæri fyrir forvitna krakka, foreldra, ömmur, afa og alla sem hafa áhuga á að upplifa vísindin á lifandi hátt. Gestir geta meðal annars kynnst stjörnufræði með Sævari Helga, tekið þátt í að skjóta vatnseldflaugum hátt upp í loft og prófað styrk sinn og hreyfigetu á stöðvum í íþrótta- og heilsufræði. Gestum gefst einnig tækifæri á að skyggnast inn í heim skurðlækninga með því að prófa að sauma í gervihúð, kynnast fréttamennsku með því að taka eigin viðtöl og fá innsýn í japanska menningu og origami. Þá verður hægt að taka þátt í tækniverkefnum tengdum forritun, vélmennum og Micro:bit og skapa með FabLab Austurlandi. Þátttakendur fá jafnframt innsýn í jarðfræði og kortagerð með sérfræðingum frá Rannsóknasetri HÍ á Breiðdalsvík og kynnast skapandi sjálfbærni og lífprenti með fulltrúum Háskóla Íslands á Hallormsstað. Aðgangur að Opna vísindahúsinu er ókeypis og engin skráning nauðsynleg. Í áhöfn Háskólalestarinnar er vísindafólk, kennarar og sérfræðingar úr fjölbreyttum greinum Háskóla Íslands. Markmið verkefnisins er að gera vísindi sýnileg og aðgengileg og styrkja tengsl háskólans við landsbyggðina. Háskólalestin hefur ferðast um landið frá árinu 2011 og hlotið Vísindamiðlunarverðlaun Rannís. Nánari upplýsingar má finna á haskolalestin.hi.is og á Facebook-síðu Háskólalestarinnar.

Nemendur í 9. bekk hafa undanfarið kynnt sér stríðsárin og áhrif þeirra bæði á Ísland og heiminn í heild. Krakkarnir unnu lokaverkefni sem þau sýndu foreldrum og nemendum á elsta stigi. Verkefnin voru fjölbreytt og fróðleg, bæði textar og skapandi verkefni. Líkan af flugvélinni sem varpaði kjarnorkusprengjunni á Hirosima, kjarnorkusprengjan sjálf, tíska og tónlist stríðsáranna og líkan af skotgröfum var meðal þess sem var til sýnis. Í maí heimsækja nemendur Stríðsárasafnið á Reyðarfirði og er það lokahnykkurinn á umfjöllun um stríðsárin. Meðfylgjandi myndir sýna fjölbreytt verkefni.

Alþjóðlega stærðfræðikeppnin Pangea er haldin í ríflega 20 löndum en markmið hennar er að vekja áhuga hjá ungu fólki á stærðfræði og hvetja þau til dáða með því að sýna þeim hve mikið er hægt að afreka ef fólk reynir. Nemendur í 8. og 9. bekk tóku þátt í tveimur undankeppnumí skólanum og tveir nemendur fengu þátttökurétt í úrslitakeppni í Reykjavík. Þeir Bjarki Jónsson og Friðjón Bragi Tómasson voru fulltrúar Egilsstaðaskóla í keppninni sem var haldin um helgina. Við óskum þeim innilega til hamingju með góðan árangur í keppninni. Þeir sem vilja fræðast meira um Pangea keppnina er bent á heimasíðu hennar www.pangeakeppni.is

Árlegur útivistardagur nemenda og starfsfólk í 1. - 4. bekk var á dögunum. Árgangarnir fóru á mismunandi staði þar sem ýmis verkefni biðu þeirra. Fyrsti bekkur var í Tjarnargarðinum þar sem þau fóru í útibingó, frisbí og sköpuðu snjólistarverk ásamt fleiru. Annar bekkur var við Samfélagssmiðjuna þar sem þau fengu að fara á hestbak, bjuggu til mandölur og spiluðu samstæðuspil svo dæmi séu tekin. Þriðji bekkur var í Selskógi þar sem þau fóru í ratleik sem reyndi á ýmsa færni s.s. náttúruþekkingu og hreyfingu. Fjórði bekkur varði deginum við Lagarfljót þar sem krakkarnir unnu að sandlistaverkum og máluðu myndir með vatnslitum. Dagurinn þótti takast vel og krakkarnir komu glaðir tilbaka í skólann.

Í mars hafa nemendur í 10. bekk fjallað um fjármál og ýmislegt í tengslum við þau. Í aðalnámskrá stendur hæfniviðmið sem tekur á þessu viðfangsefni og hljóðar svo: Við lok 10. bekkjar getur nemandi nýtt helstu hugtök fjármála, í tengslum við eigin fjármál, launagreiðslur, skatta og fjárfestingar og nýtt við útreikninga og úrlausnir verkefna daglegs lífs. Krakkarnir fengu fræðslu frá Arion banka og VR; Þau tóku þátt í Fjármálaleikunum, sem er fræðsluverkefni á vegum Fjármálavits en það er í eigu Samtaka fjármálafyrirtækja. Nemendur í 50 grunnskólum á landinu tóku þátt í Fjármálaleikunum í ár. Á vefsvæði Fjármálavits eru ýmsar hagnýtar upplýsingar um fjármálafræðslu fyrir nemendur í grunn- og framhaldsskólum. Einnig unnu krakkarnir stór lokaverkefni þar sem þau völdu sér viðfangsefni. Þar var val um nokkur viðfangsefni, t.d. hvað kostar að reka fjölskyldu í eitt ár, hvað kostar að taka bílpróf í eitt ár, hvað kostar að eignast eigið húsnæði. Verkefnið reyndi á kunnáttu í excel-forritinu. Krakkarnir voru mjög áhugasöm í þessari vinnu, sem fól m.a. í sér að skoða launaseðla og velta fyrir sér ýmsum hugtökum í tengslum við fjármál. Von er á fræðslu frá fleiri stéttarfélögum fyrir skólalok enda er mikilvægt fyrir krakkana að þekkja til þess hvaða réttindi og skyldur hvíla á herðum atvinnurekenda og launþega.

Fjórða og síðasta árshátíð Egilsstaðaskóla fór fram í vikunni. Yngstu nemendur skólans, í 1. og 2. bekk, sýndu Kardemommubæinn fyrir stappfullu húsi. Sumir voru að stíga sín fyrstu skref á sviði og stóðu sig með mikilli prýði. Það liggur misvel fyrir 6 og 7 ára gömlum börnum að standa á sviði fyrir framan fullan sal af fólki og því þurfa margir að fara útfyrir þægindaramma sinn í verkefnum sem þessum. Og gleðin var einlæg hjá leikurunum að sýningunni lokinni sem streymdu af sviðinu til fjölskyldna sinna. Að venju tóku margir þátt í að undirbúa sýninguna; bekkjarteymi 1. og 2. bekkjar með umsjónarkennara í fararbroddi báru meginþungann af sviðsetningunni með aðstoð starfsfólks skólans sem aðstoðaði við gerð sviðsmyndar og ýmislegt tilfallandi. Nemendur úr 5. bekk voru tæknimenn á sýningunni og stóðu sig feikilega vel. Kennarar í Tónlistarskólanum á Egilsstöðum, Berglind, Margrét Lára og Bríet undirbjuggu börnin fyrir söngatriði og Berglind stjórnaði söngatriðum í sýningunni. Fyrir það eru við í Egilsstaða mjög þakklát. Árshátíðarvinnan er skemmtileg og gefandi en oft á tíðum krefjandi þar sem þá reynir á aðra þætti hjá nemendum en inni í kennslustofum. Þessi reynsla og lærdómur er ekki síður mikilvægur en vinna í námsbókum og margir búa að því að hafa tekið þátt í sviðsetningum á leikritum í grunnskóla.

Lesarar úr grunnskólum á norðursvæði Austurlands, frá Vopnafirði að Seyðisfirði, komu saman í Egilsstaðakirkju á Lokahátíð Stóru upplestrarkeppninnar í ár. Það var hátíðleg stund þegar 12 lesarar fluttu texta úr Fjársjóðsleit í Granada eftir Ólaf Pál Jónsson. Krakkarnir fluttu svo ljóð sem öll fjölluðu um fugla og loks ljóð að eigin vali. Þrír dómarar dæmdu lesturinn og kynntu úrslitin en Inga Hrafney Stefánsdóttir hlaut fyrsta sæti og í öðru og þriðja sæti urðu drengir úr Brúarásskóla, þeir Manuel Arnar Logi Ragnarsson og Fróði Hlynsson. Vinningshafar fengu viðurkenningarskjal, bókagjöf og peningaverðlaun fyrir þátttöku sína í keppninni. Nemendur í Tónlistarskólanum á Egilsstöðum fluttu tónlistaratriði á meðan dómarar réðu ráðum sínum.

Eitt af föstum verkefnum í skólastarfinu er Stóra upplestrarkeppnin. Undirbúningur keppninnar, sem reyndar má frekar kalla upplestrarhátíð, hefst formlega á degi íslenskrar tungu þann 16. nóvember ár hvert. Undirbúningurinn felst í því að nemendur í 7. bekk æfa sig í upplestri og síðan er haldin bekkjarkeppni þar sem allir nemendur bekkjarins lesa upp valinn texta og ljóð. Fengnir eru dómarar úr hópi starfsfólks skólans sem velja 15 nemendur til að halda áfram í svokallaða skólahátíð upplestrarkeppninnar. Í þeim hluta eru fengnir aðilar utan skólans til að dæma frammistöðu nemenda og þar eru valdir fimm nemendur til þátttöku í lokahátíð stóru upplestrarkeppninnar sem er skipulögð af Skólaþjónustu Múlaþings og í henni taka þátt nemendur í 7. bekk úr öðrum skólum í Múlaþingi og frá Vopnafirði. Það er alltaf gaman að sjá framfarirnar sem nemendur taka á æfingatímanum og allir búa að þessari þjálfun til lengri tíma.

Krakkarnir í 3. og 4. bekk sýndu Kardemommubæinn á árshátíð sinni í liðinni viku. Ræningjarnir, Soffía frænka, Bastían bæjarfógeti, ljónið og auðvitað allir íbúarnir í Kardemommubæ, léku við hvern sinn fingur. Margir leggja hönd á plóg við undirbúning árshátíðar; Umsjónarkennarar æfðu krakkana og höfðu umsjón með skreytingum í sal og leikskrá. Þórarinn húsvörður smíðaði nýjan turn Tóbíasar og umsjónarkennari í 4. bekk málaði hann. Foreldrar aðstoðuðu börnin við að finna búninga. Við erum afar þakklát kennurum í Tónlistarskólanum á Egilsstöðum, þeim Berglindi Halldórsdóttur, Margréti Láru Þórarinsdóttur og Bríeti Finnsdóttur, fyrir aðstoð við æfingar á söngatriðum. Krakkarnir voru mjög ánægð með sýninguna og var vel fagnað í lokin af fullum sal áhorfenda.