Fréttir

Á starfsdegi var skólanum afhent hjartastuðtæki frá Kvenfélaginu Bláklukku. Það voru fulltrúar kvenfélagsins, þær Jóhanna Jörgensdóttir formaður og Málfríður Hannesdóttir, sem afhentu skólastjóra gjöfina á starfsmannafundi. Á skyndihjálparnámskeiði, sem starfsfólk skólans sótti í vetur, var rætt um nauðsyn þess að geta brugðist fljótt við skyndilegum veikindum á stórum vinnustað eins og Egilsstaðaskóla en þar starfa ríflega 500 manns á aldrinum 6 - 67 ára á hverjum degi. Starfsfók skólans er afar þakklátt kvenfélagskonum fyrir þessa veglegu og góðu gjöf.

Egilsstaðaskóla var slitið í 78. skipti 10. júní í þremur athöfnum. Á skólaslitum 1. - 9. bekkjar voru tónlistaratriði flutt af nemendum í Tónlistarskólanum á Egilsstöðum auk þess sem skólasöngurinn var fluttur eftir nokkurt hlé en höfundur textans, Sigþrúður Sigurðardóttir, lætur af störfum í vor eftir margra ára störf við skólann. Afhent voru verðlaun fyrir bestu myndir í ljósmyndamaraþoni sem 8. og 9. bekkur tók þátt í á vordögum. Nemendur fengu svo vitnisburð sinn afhentan og héldu að því loknu út í sumarfrí. Um kvöldið var útskrift 10. bekkjar en þar voru flutt ávörp og tónlistaratriði. Viðar Jónsson skólastjóri talaði til nemenda sem voru að útskrifast og þakkaði þeim gefandi samstarf. Árni Stefán Ólafsson formaður Nemendaráðs flutti ávarp fyrir hönd útskriftarnema og umsjónarkennarar 10. bekkjar ávörpuðu samkomuna og minntust liðinna stunda með bekknum. Veittar voru viðurkenningar fyrir góðan árangur í námi, dugnað, frumkvæði, framfarir, seiglu og prúðmennsku. Nemendur færðu 10. bekkjarteyminu gjafir og þakkir fyrir samveruna. Hljómsveit skipuð útskriftarnemendum fluttu 3 lög við afar góðar undirtektir viðstaddra. Starfsfólk Egilsstaðaskóla þakkar nemendum og forráðamönnum þeirra fyrir samstarfið á skólaárinu og óskar þess að allir njóti sumarsins sem best.

Í maí unnu nemendur í 10. bekk að lokaverkefnum sínum. Ferlið hefst á hugmyndavinnu sem svo þróast yfir í lokaafurð. Krakkarnir vinna verkefnið bæði í skólanum og heima hjá sér enda þurfa sumir aðstöðu og verkfæri í gerð stærri verkefna. Á sýningunni var augljóst að krakkarnir höfðu lagt mikla vinnu í verkefnin sín og að þar lá mikill metnaður að baki. Við óskum krökkunum í 10. bekk til hamingju með glæsileg lokaverkefni!

Nemendur í 2. bekk héldu uppskeruhátíð á fjölbreyttum verkefnum í tengslum við vinnu með bókina Blómin á þakinu. Verkefnið er samþætt í íslensku, samfélagsfræði, náttúrufræði og við list- og verkgreinar og hefur verið unnið á undanförnum vikum. Það var mikill metnaður í verkefnum krakkanna sem voru í formi texta, teikninga, smíðisgripa, textílverka og skrauthluta úr leir auk þess sem þau unnu verkefni í heimilisfræði í tengslum við lestur bókarinnar. Sagan um Gunnjónu er eftir Ingibjörgu Sigurðardóttur og myndskreytt af Brian Pilkington og fjallar um flutning fullorðinnar konu úr sveit í borg. Umskiptin reyna á Gunnjónu en hún er lausnamiðuð og smám saman tekst henni að aðlagast borgarlífinu með góðra vina hjálp.

Undanfarið hafa krakkarnir í 4. bekk unnið fjölþætt verkefni um landnám Íslands. Verkefnið er samþætt við vinnu í list- og verkgreinum og afraksturinn í formi hluta sem krakkarnir hafa búið til, myndefnis og upplýsingatexta. Landnámsmennirnir sigldu til Íslands og krakkarnir gerðu myndir af skipunum, fólkinu og búsmalanum sem komu með til landsins. Þau smíðuðu viskuskrín og í þeim eru rúnir, uppskrift að lummum, spjaldofin bönd og fleira fallegt. Það voru líka gerðir leikþættir um landnámsfólkið og hver hópur sýndi sinn leikþátt. Auk þess kynntu krakkarnir sér íslenska fugla og gerðu veggspjöld um þá. Meðfylgjandi eru myndir af verkefnum á sýningunni

Lið Egilsstaðaskóla keppti í úrslitakeppni Skólahreysti í íþróttahúsinu Varmá í Mosfellsbæ um síðustu helgi. Liðið stóð stig með mestu prýði og hafnaði í 7. sæti en alls kepptu 12 lið til úrslita. Vaskur hópur stuðningsmanna keyrði til Reykjavíkur að morgni laugardags og beint til baka að keppni lokinni og þá bættust keppendur í hópinn. Við erum mjög stolt af því að liðið okkar komst í úrslitakeppnina og óskum þeim hjartanlega til hamingju með góðan árangur. Þjálfarar liðsins, þeir Adam Eiður Ásgeirsson og Kristófer Páll Viðarsson fá sömuleiðis þakkir fyrir gott starf og Austur fyrir að gera okkur kleift að nýta góða æfingaaðstöðu þeirra. Hlökkum til næstu Skólahreystikeppni!

Mánudaginn 18.maí fór 9.bekkur í vorferð til nágranna okkar í Fjarðabyggð. Stríðsárasafnið á Reyðarfirði var heimsótt, en nemendur hafa í vetur lært um Seinni heimstyrjöldina og stríðsárin á Íslandi. Árni Pétur Árnason, verkefnastjóri Menningarstofu Fjarðabyggðar, tók á móti hópnum og sagði þeim frá safninu og svaraði spurningum. Næst var haldið á Norðfjörð og stoppað við minningarreit um snjóflóðin í Neskaupstað þar sem nemendur fræddust um flóðin og hörmulegar afleiðingar þeirra, auk þess að skoða snjóflóðavarnargarða. Nesti var snætt á bryggjunni við Safnahúsið í Neskaupstað í ágætu veðri. Eftir stutta kynningu á söfnum í Safnahúsinu fengu nemendur frjálsar hendur og gátu skoðað söfnin í samræmi við áhuga. Menningarstofa Fjarðabyggðar fær bestu þakkir fyrir móttökurnar. Nemendur fá einnig hrós fyrir áhuga og þakkir fyrir skemmtilega samveru.

Árleg vorferð 5.bekkinga í Fljótsdalinn var farin í vikunni. Krakkarnir heimsóttu Fljótsdalsstöð, Skriðuklaustur og Snæfellsstofu Á öllum stöðum var vel tekið á móti hópnum og þau fengu kynningu á því sem gert er á hverjum stað. í Fljótsdalsstöð var sagt frá virkjuninni og ekið inn í fjallið á rútunni. Á Skriðuklaustri var sagt frá Gunnari Gunnarssyni rithöfundi, tilurð hússins á Skriðuklaustri og starfsemi Gunnarsstofnunar. Krakkarnir rituðu nöfn sín á gestabókarrefil og gæddu sér á nýbökuðum kleinum. Í Snæfellsstofu var leiðsagt um sýningu og sagt frá Vatnajökulsþjóðgarði en fyrr í vetur kom landvörður í heimsókn til 5. bekkjar og sagði frá þjóðgarðinum. Allir sem tóku á móti hópnum fá bestu þakkir fyrir góðar móttökur og fróðlega leiðsögn.

Á unglingastigi Egilsstaðaskóla hefur verið unnið að lýðræðis- og kosningaverkefni upp á síðkastið. Hluti af verkefni var að kynna sér þau framboð sem bjóða fram til sveitarstjórnarkosninga í Múlaþingi og semja spurningar til frambjóðenda. Í morgun, fimmtudaginn 7. maí, mættu svo fulltrúar allra framboðanna í Egilsstaðaskóla og sátu fyrir svörum í matsal skólans. Rakel Wium Ágústsdóttir, nemandi í 10. bekk, stýrði fundinum af röggsemi og bauð frambjóðendur velkomin. Hún skýrði fyrir þeim fyrirkomulag fundarins og bauð þeim í kjölfarið að kynna sig og sitt framboð, en hver frambjóðandi hafði þrjár mínútur til þess. Nemendur spurðu því næst frambjóðendur spurninga sem höfðu verið undirbúnar fyrirfram og frambjóðendur höfðu mínútu til að svara hverri spurningu. Að lokum fengu frambjóðendur öll spurninguna “Hver í flokknum myndi lifa af í Survivor?” sem vakti mikla kátínu. Rakel þakkaði þá frambjóðendum fyrir góðan fund og þau hlutu lófatak fyrir vasklega framgöngu. Þeir frambjóðendur sem mættu á fundinn voru Ásrún Mjöll Stefánsdóttir fyrir Vinstri græn og óháð, Einar Freyr Guðmundsson fyrir Sjálfstæðisflokkinn, Hólmfríður Rut Einarsdóttir fyrir Austurlistann og Viðreisn, Jóhann Harðarson fyrir Miðflokkinn og Þórey Birna Jónsdóttir fyrir Framsóknarflokkinn. Nemendur í 8.-10. bekk stóðu sig ekki síður frábærlega, það var gott hljóð á meðan frambjóðendur tjáðu sig og spurningarnar voru vel úthugsaðar og skemmtilegar.

Það var gríðarleg spennandi að fylgjast með keppendum Egilsstaðaskóla í Skólahreysti á Akureyri. Sex krakkar skipuðu lið skólans sem bar sigur úr býtum í sínum riðli í undanúrslitum. Þar með tryggðu þau sér rétt til keppni í úrslitakeppni Skólahreysti sem fer fram í Reykjavík þ. 23. maí. Hópur nemenda tók þátt í Skólahreystivali sem fór af stað eftir áramótin undir leiðsögn Adams Eiðs Ásgeirssonar íþróttakennara og Kristófer Páls Viðarssonar stuðningsfulltrúa og styrktarþjálfara. Í apríl fór fram úrtakskeppni þar sem kom í ljós hverjir skipuðu keppnisliðið. Þau Andrea Ýr Benediktsdóttir, Aron Daði Einarsson, Guðfinnur Snær Þorlaugsson, Hinrik Nói Guðmundsson og Kristín Indíana Káradóttir úr 10. bekk og Edda Pétursdóttir úr 9. bekk voru fulltrúar Egilsstaðaskóla. Liðið hélt til Akureyrar strax að aflokinni Háskólalestinni ásamt stórum hópi stuðningsfólks, bæði nemenda og kennara. Liðið stóð sig frábærlega vel og nú hlökkum við til að fylgjast með þeim í úrslitakeppninni.