Fréttir

Í síðustu viku sýndu nemendur á elsta stigi söngleikinn High School Musical á tveimu sýningum. Krakkarnir hafa undirbúið og æft söngleikinn frá því í haust og margir komið að uppfærslunni. Hópur nemenda var í valnámskeiði sem útbjó sviðsmynd og hannaði búninga og nokkrir nemendur tóku að sér að hanna lýsingu og stjórna hljóði. Það er alltaf mikil spenna í aðdraganda árshátíðarinnar enda mikil vinna að baki. Áhorfendur fögnuðu vel á sýningunum tveimur og full ástæða til því krakkarnir stóðu sig einstaklega vel.

Þar sem fjöldi unglinga kemur saman þar er fjör! Í Egilsstaðaskóla hafa unglingarnir fengist við fjölbreytt verkefni síðustu daga. Legoliðið hefur æft sig af kappi fyrir First Lego League keppnina sem verður í Háskólabíói á laugardaginn. Hægt verður að fylgjast með liðinu á netinu en keppnin hefst kl. 9.30. Slóðin er: https://firstlego.is/ Hópur krakka valdi sér viðfangsefni sem þau unnu að og meðal afurðanna úr þeirri vinnu eru spil sem þau hönnuðu frá grunni. Og spennan fyrir árshátíðinni hefur stigmagnast. Fyrri sýningin á High School Musical verður í kvöld, miðvikudag og sú seinni annað kvöld. Báðar sýningar hefjast kl. 19.30. Það eru glaðir en spenntir nemendur sem bíða eftir að stíga á svið og sömuleiðis þeir sem stjórna ljósum, hljóði og stýra innkomum á sviðið. Við munum birta myndir frá sýningunni á næstunni.

Stór hluti nemenda á elsta stigi hefur undanfarnar vikur undirbúið árshátíð sína, sem að þessu sinni er uppsetning á söngleiknum High School Musical. Það er að ýmsu að huga við uppsetningu sem þessa; gerð leikmyndar, samsetningu gerva, æfingar á söng og dönsum auk æfinga á leikritinu sjálfu. Nemendur sjá um að stýra ljósi og hljóði á sýningunum, með aðstoð kennara. Að ósk krakkanna sjálfra verða tvær sýningar og þær eru miðvikudaginn 13. nóvember og fimmtudaginn 14. nóvember, báðar klukkan 19.30. Það er enginn aðgangseyrir að árshátíðum Egilsstaðaskóla en tekið við frjálsum framlögum sem fara í leiklistarsjóð skólans til kaupa á búnaði.

Um miðjan nóvember hefst nýtt valtímabil á elsta stigi. Samkvæmt aðalnámskrá á val í 8. - 10. bekk að vera fimmtungur af námi nemendanna. Skólaárinu er skipt upp í fjögur valtímabil en valið er kennt á þriðjudögum og fimmtudögum, frá kl. 13.50 - 15.10. Upplýsingar um þau námskeið sem eru í boði er að finna í valbæklingi sem er aðgengilegur á heimasíðu skólans, undir tenglinum Nám og kennsla - Val í 8. - 10.bekk. Heimilt er að meta frístundastarf, s.s. íþróttaiðkun og sjálfboðaliðastarf sem utanskólaval. Sömuleiðis er hægt að fá tónlistarnám metið sem utanskólaval. Þeir sem taka hluta vals utanskóla þurfa að fá staðfestingu foreldra / forsjáraðila með undirskrift á valblaðið. Með breytingum á Aðalnámskrá grunnskóla fyrr á árinu varð breyting varðandi það hvað má meta sem utanskólaval. Áður var heimilt að meta launaða vinnu sem utanskólaval en það hefur verið afnumið. Meiri upplýsingar um val er að finna í Aðalnámskrá grunnskóla, á vefsvæðinu www.adalnamskra.is

Í dag mæta nemendur Egilsstaðaskóla í viðtöl til umsjónarkennara með forráðafólki sínu. Dagurinn er nýttur til ýmissa annarra verka og starfsfólk skiptist á að æfa sig í að slökkva eld með slökkvitæki undir styrkri handleiðslu slökkviliðsmanna hjá Slökkviliði Múlaþings. Svo styttist í árshátíð elsta stigs og því er dagurinn nýttur til æfinga en sumir nemendur nota líka tímann til að læra.

Krakkarnir í 4. bekk hafa undanfarið kynnt sér veðrið, lært veðurtákn og samið sína eigin veðurlýsingu. Þau söfnuðu orðum sem lýsa veðri og útbjuggu veðurkort. Nú geta þau nýtt sér það að ræða um veðrið ef umræðuefni þrýtur.

Það voru margar sérkennilegar verur sem mættu í skólann í morgun tilbúnar í hrylling dagsins! Nemendur og starfsfólk mætti uppábúið og víða var búið að koma upp skreytingum í anda Hrekkjavökunnar enda finnst mörgum þessi dagur skemmtileg tilbreyting frá hversdagsleikanum. Svavar Knútur hélt tvenna örtónleika fyrir krakkana á miðstigi og elsta stigi sem tóku vel á móti þessum ágæta tónlistarmanni.

Skelfilegi bókaklúbburinn er nú í gangi á bókasafninu í tilefni al-íslenskrar hrekkjavöku. Það er hægt að finna hinar ýmsu hryllilegu hryllingssögur, mishryllilegar eftir aldri og þori nemenda. Krakkarnir, sem vilja taka þátt, fá lestrarkort og geta valið sér hryllingsmyndir til að líma í það þegar þau hafa lokið bók. Nú þegar hafa um 140 börn skráð sig í klúbbinn því það er gríðarlegur áhugi á að taka þátt. Klúbburinn lifir næstu þrjár til fjórar vikur en þá tekur jólaklúbburinn við.

Nemendur í 9. og 10. bekk fengu heimsókn frá Alþingi í morgun. Í tilefni þess að 80 ár eru liðin frá stofnun íslenska lýðveldisins hefur starfsfólk skrifstofu Alþingis ferðast um landið til að heimsækja grunnskóla á landsbyggðinni þar sem þeir kynna starfsemi Alþingis og setja upp eins konar Skólaþing. Nemendum var skipt í 4 þingflokka og ýmis mál rædd. Gestirnir voru mjög ánægðir með hve virkan þátt krakkarnir tóku þátt í umræðunni og hældu hópunum.

Í haust urðu ýmsar breytingar á nýtingu húsnæðis Egilsstaðaskóla. Árgangar voru fluttir til í þeim tilgangi að nemendur fengju meira rými, aðstaða starfsfólks var sameinuð og opin rými nýtt sem vinnusvæði. Fjórir deildarstjórar hafa sameiginlega vinnuaðstöðu í því sem áður var fundaherbergi, skólastjóri og aðstoðarskólastjóri deila skrifstofu, náms- og starfsráðgjafi og félagsfærnikennari deila rými og þrjú rými, sem áður voru skrifstofur eru nú fundaherbergi, vinnurými og kennsluaðstaða. Bókasafn skólans hefur tekið nokkrum breytingum og er að hluta til opið fyrir börnin sem eru í Frístund fyrir og eftir skóla. Frístund hefur nú aðstöðu á efstu hæð, við hliðina á bókasafninu. Fjórði og fimmti bekkur eru í vetur á efstu hæð skólans, næst bókasafni en þar er möguleiki á að opna flekahurðir á milli stofanna og þannig er hægt að nýta rýmið ennþá betur. Meðfylgjandi eru myndir af aðstöðu 4. bekkjar þar sem sést hvernig kennslurýmið lítur út í dag. Einnig fylgir mynd af verkefni nemenda sem sýna hringrás vatns og af hluta bekkjarsáttmála sem börnin hafa sameinast um.