Fréttir

Það var litríkur hópur nemenda og starfsfólks sem mætti í skólann í morgun. Jólapeysur, jólahúfur, jólasokkar og alls konar jólaskraut hafði verið dregið fram og því skartað í tilefni af því að nú styttist mjög til jóla.

Í haust kallaði Mjólkursamsalan eftir textum frá nemendum í elstu bekkjum grunnskóla. Frá árinu 1994 hefur MS nýtt fjölbreyttar leiðir til að efla móðurmálið og hafa stærstu og sýnilegustu verkefnin verið íslenskuátök á mjólkurfernum. Yfir 1200 textar bárust frá nemendum víða af landinum. Af 48 textum, sem munu birtast á mjólkurfernum á næstunni, eiga nemendur úr Egilsstaðaskóla sex. Hér fyrir neðan eru myndir af textunum eftir þær Mariu Önnu, Rakel, Kötlu Lind, Sólveigu Ásu, Sól og Karen Töru. Við óskum þeim innilega til hamingju með frábæra texta og hlökkum til að fylgjast með mjólkurfernunum á næstunni.

Í Egilsstaðaskóla eru 420 nemendur og hátt í 100 starfsmenn. Það er margt í gangi á venjulegum degi, eins og í dag þriðjudaginn 7. desember. Alls staðar er verið að vinna að einhverju ákveðnu og hver manneskja hefur sitt hlutverk. Það er litað, bakað, hlustað, skrifað, saumað, prjónað, þvegið, smíðað, eldað, talað, hlegið og gantast. Í fyrirlestrasal er æfð endurlífgun. Meðfylgjandi eru myndir teknar í húsinu í dag, sem sýna hluta þess sem var í gangi á stórum vinnustað. Ró yfir húsinu og jólaandinn farinn að setja svip sinn á húsnæðið og verkefnin sem voru í vinnslu.

Í 9. bekk er fjallað um mannslíkamann í náttúrufræði. Hluti af náminu fer fram með krufningu á innyflum.Krakkarnir eru áhugasöm um að skoða mismunandi líffæri og greina þau enda er þetta áþreifanlegra en horfa á myndir í bók og veitir dýrmæta innsýn í líkamsstarfsemi manna og dýra.

Nemendur og starfsfólk skólans fögnuðu fullveldi landsins þann 1. desember sl. Skólastjóri og formaður Nemendaráðs, Ríkey Anna Ingvarsdóttir, fluttu ávörp á stuttum samverustundum í matsal. Jóhann Smári Kjartansson, nemandi í 8. bekk, las dæmisögu Esóps um hérann og skjaldbökuna. Jóhann Smári var einn vinningshafa í Stóru upplestrarkeppninni síðasta vetur. Í lokin sungu nemendur saman þrjú lög í tilefni af því að dagurinn er líka dagur tónlistarinnar. Allir voru spariklæddir í tilefni dagsins.

Tugir unglinga stigu á svið á árshátíð elsta stigs Egilsstaðaskóla í vikunni. Undanfarnar vikur hafa lögin úr söngleiknum Grease hljómað um ganga skólans og víða var verið að undirbúa allt það sem þarf á sýningu sem þessari; Það þurfti að smíða bekki fyrir sviðsmyndina, mála barinn, finna til búninga, mála sviðsmyndina, gera árshátíðarstafina, æfa dansa og söngva, æfa senur, koma hljóði í lag, æfa hljómsveit og hanna lýsinguna. Allt þetta hafa krakkarnir verið að gera í aðdraganda sýningarinnar ásamt öllum kennurum á unglingastigi en auk þeirra aðstoðuðu list- og verkgreinakennarar við sviðsmynd. Húsvörður skólans, Þórarinn Bjarnason aðstoðaði við smíði á leikmynd og uppsetningu á henni. Leikstjóri sýningarinnar var Hrefna Hlín Sigurðardóttir kennari en árshátíðin var samvinnuverkefni allra sem koma að unglingastiginu. Tónlistarskólinn á Egilsstöðum aðstoðaði við að æfa söng og undirleik. Þeim kennurum og nemendum tónlistarskólans, sem spiluðu með hljómsveitinni, þökkum við innilega fyrir samstarfið.

Umboðsmaður barna stóð fyrir barnaþingi föstudaginn 17. nóvember. Þetta er í þriðja sinn sem barnaþing er haldið en það hefur verið haldið á tveggja ára fresti. Um 150 börn á aldrinum 11 – 15 ára víðs vegar af landinu sótti þingið en þátttakendur eru valdir með slembiúrtaki úr Þjóðskrá. Þrír nemendur í Egilsstaðaskóla sóttu þingið, einn úr 9. bekk og tveir úr 7. bekk. Börnin ræddu ýmis mál en m.a. kom fram að börn telja brýnt að stjórnvöld hlusti meira á börn og að réttindi allra barna væru tryggð. Lagt var til að sálfræðiþjónusta væri til staðar í öllum skólum, kosningaaldur væri lækkaður niður í 16 ár, skólakerfið væri sniðið betur að þörfum allra og bið eftir greiningum væri stytt. Auk þess bentu börnin á að bæta þyrfti þjónustu fyrir flóttafólk, strætó væri ókeypis fyrir öll börn undir 18 ára og að öll kyn fengju sömu réttindi í íþróttum. (Upplýsingar teknar af heimasíðu Umboðsmanns barna, www.umbodsmaður.is)

Seinni hluti Skólaþings Egilsstaðaskóla var haldið í gær. Nemendur í 1. – 6. bekk, foreldrar þeirra og forsjáraðilar, fóru í ferðalag um skólann í nokkurs konar ratleik. Fjölbreytt verkefni voru á stöðvum um allan skóla og því mikið líf í öllu húsinu. Verkefnin voru t.d. að klippa út fótspor sitt og festa á vegg, mæla hávaða í desibilum, þrykkja lófafar á óralangan pappírsstranga, smakka góðgæti í heimilisfræðistofu og fræðast um fæðuhringinn, mynda orð úr orði og leysa ýmsar þrautir svo dæmi séu tekin. Börnin svöruðu líka spurningum sem vörðuðu líðan þeirra og skólastarfið. Spurt var hvar og hvernig þeim þætti best að lesa, hvernig væri best að læra stærðfræði, hvernig mætti minnka hávaða í kennslustofunum og ýmislegt fleira. Spurningarnar voru mótaðar útfrá svörum í Skólapúlsinum og hugmyndin að kalla eftir áliti barnanna á hvernig hægt sé að bæta þætti í skólastarfinu til að komið sé betur til móts við þarfir þeirra. Það var gott að sjá foreldra og börn vinna saman, ræða um skólann og kryfja málin. Kennarar undirbjuggu ferðalagið eða ratleikinn með forritinu Actionbound en því er hlaðið niður í snjalltæki og skráð inn með QR kóða. Þetta var í fyrsta sinn sem þessi leið er farin á skólaþingi í Egilsstaðaskóla og í ferlinu safnaðist mikil reynsla og þekking hjá starfsfólkinu. Við þökkum foreldrum og forsjáraðilum innilega fyrir að koma á Skólaþingið og hlökkum til að kynna niðurstöður þess síðar í vetur.

Á fyrra Skólaþingi vetrarins ræddu nemendur í 7. - 10. bekk, ásamt foreldrum sínum um tækifæri og áskoranir við það að Egilsstaðaskóli verði símalaus. Lykilspurning þingsins var "Hver eru tækifærin við skóla án síma og hverjar eru áskoranirnar? Skólaþingið var sett upp eins og heimskaffi þannig að umræður fóru í fyrstu umferð fram á 4 manna borðum. Í annarri umferð dreifðust þáttakendur á önnur borð og umræðunni lauk svo með því að upphaflegur umræðuhópur greindi leiðir til að takast á við áskoranir og hvernig fanga mætti tækifærin. Það var mjög ánægjulegt að fylgjast með umræðunni en niðurstöður þingsins verða nýttar í undirbúningi fyrir að skólinn verði snjallsímalaus um næstu áramót. Niðurstöðurnar verða kynntar fyrir foreldrum og forsjáraðilum í fréttabréfi þegar úrvinnslu er lokið. Það er mikilvægt að fá foreldra og forsjáraðila í skólann til að fjalla um mál með börnum sínum. Við þökkum þeim sem mættu kærlega fyrir þátttökuna.