Fréttir

Fimmtudaginn 31. mars síðastliðinn var Litla upplestrarkeppnin haldin hátíðleg hjá nemendum í 4. bekk. Nemendur buðu foreldrum sínum að koma og hlusta og nemendum í 3. bekk skólans var jafnframt boðið. Hátíðin var virkilega vel heppnuð, nemendur komu fram og lásu kvæði, málshætti og andheiti bæði allir saman sem hópur en einnig í smærri hópum. Þá voru nemendur úr bekknum sem einnig eru í tónlistarnámi við tónlistarskólann með atriði en þau sungu, spiluðu á ukulele og píanó. Nemendur úr 7. bekk sem báru sigur úr bítum í stóru upplestrarkeppninni voru auk þess gestir á hátíðinni. Að lokinni vel heppnaðri dagskrá á sviðu buðu nemendur foreldrum sínum í heimsókn inn í stofur að skoða afrakstur verkefna sem þau hafa unnið um Norðurlöndin og landnám Íslands síðustu vikur.

Þann 30. mars síðastliðinn var útivistardagur hjá nemendum í 5.-7. bekk. Nemendum stóð til boða tveir kostir sem þeir þurftu að velja fyrirfram. Annað var gönguferð í Finnsstaði í Eiðaþinghá með Þórdísi Kristvinsdóttur, leiðsögumanni og Hildi Bergsdóttur, útivistarþjálfara. Hitt var skíða-, bretta- og/eða sleðaferð í Stafdal. Hópur 40 nemenda gekk sem leið lá eftir stíg meðfram Eyvindaránni í Finnsstaði. Á Finnstöðum var hægt að klappa hestum, kanínum og naggrísum og þeim gefið salat og gulrætur auk þess sem farið var í ævintýraratleik. Í skógarrjóðrinu á staðnum var tálgað, poppað og grillað góðgæti. Góður dagur í ævintýralandinu á Finnsstöðum. Á sama tíma fóru rúmlega 70 nemendur í rútu í Stafdal. Sumir alvanir brekkunum á meðan aðrir stigu í fyrsta skipti á skíði eða snjóbretti. Skíðakennari var á staðnum til að leiðbeina nýliðum. Það var gaman að sjá hvað nemendur voru tilbúnir að láta vaða og standa alltaf upp aftur eftir ítrekuð föll. Seiglan! Veðrið var eins og best verður á kosið á þessum árstíma. Dúnalogn og nokkrir sólargeislar náðu í gegnum skýin á tímabili. Heilt yfir frábær dagur hjá okkar fólki. Ánægjan skein úr andlitum nemenda og greinilega kærkomið að fara aðeins út úr skólanum og stunda nám af öðrum toga en gengur og gerist hversdags.

Í vetur hafa kennarar í Egilsstaðaskóla ásamt kennurum í öðrum grunnskólum Múlaþings tekið þátt í þróunarstarfi við að innleiða og styrkja leiðsagnarnám í sessi í skólastarfinu. Um er að ræða þriggja ára þróunarverkefni í samstarfi við Háskólann á Akureyri, sem byggir á reglulegum námskeiðum við upphaf anna og vinnu innan skólans þess á milli.

Öllu skólastarfi í Egilsstaðaskóla hefur verið aflýst vegna slæmrar veðurspár á morgun, mánudaginn 7.febrúar. þessi ákvörðun er tekin í samráði við fræðslufulltrúa og almannavarnir. Veðurspá gerir ráð fyrir suðaustan 20-25 m/s fyrri hluta dags með snjókomu og skafrenningi. Talsverðar líkur á foktjóni og samgöngutruflunum. School has been cancelled on Monday February 7th due to weather forceast expecting severe weather with violent winds and blizzard conditions. This has been decided in consultation with Department of Civil Protection and Emergency Management.

Frá og með miðnætti tóku gildi nýjar reglur varðandi sóttkví og smitgát. Nú eru börn á grunnskólaaldri undanþegin reglum um smitgát og sóttkví ef smit er utan heimilis. Þetta gæti þýtt að smitum muni fjölga í skólum. Reglugerð um takmarkanir á skólastarfi er enn í fullu gildi fram í næstu viku og því eru engar breytingar hér innanhúss enn sem komið er. Við höfum fengið samþykki fyrir því að skipta matsalnum í tvö hólf sem þýðir að allir árgangar utan 2. og 5.bekkjar matast í matsal. 2. og 5. bekkur matast í kennslustofum. Áfram gildir að senda nemendur ekki í skólann finni þeir fyrir einkennum. Hafi nemendur farið í einkennasýnatöku, geta þeir mætt í skólann með kvefeinkenni. Athugið að hraðpróf nægir ekki ef einkenni eru til staðar. Töluvert álag er í skólanum þessa dagana m.a. vegna sóttkvíar og sýnatöku, ofan á annað álag svo sem veikindi. Við höfum því gripið til þess í auknum mæli að fella niður einstaka kennslustundir hjá bekkjum og stytta daga hjá bekkjum á efra miðstigi og elsta stigi. Ég á von á því að svo verði áfram á meðan að þetta ástand varir. Stjórnendur skólans eru þakklátir fyrir skilning foreldra og forráðamanna, og gott samstarf um það stóra verkefni að halda skólastarfi gangandi þessar vikurnar og við vonum áfram að allt fari hér á besta veg.

Bóndadagurinn er á morgun. Af því tilefni ætlum við í skólanum að vera á þjóðlegum nótum. Í hádeginu verður boðið upp á þorramat og gaman væri ef nemendur og starfsfólk mæti t.d. í lopapeysu, lopasokkum eða með lopahúfu. Kannski mun Þorraþrællinn óma um ganga skólans. Vissu þið að elstu heimildir um þorrablóti eru frá árinu 1867.

Við óskum nemendum okkar og fjölskyldum gleðilegs árs með þökkum fyrir samstarfið á liðnu ári. Skólahald nemenda hefst í dag, þriðjudag samkvæmt stundatöflu. Auknar takmarkanir verða í skólastarfinu og munu þær fyrst og fremst snerta matartíma nemenda, en hámarksfjöldi nemenda í hverju rými er 50 nemendur, sem verður til þess að aðeins einn árgangur í einu getur nýtt matsalinn. Í samráð við mötuneyti höfum við sett um breytt matarplan þar sem fjórir árgangar munu nýta matsal, en sex árgangar skólans munu matast í kennslustofum. Þeir árgangar sem munu matast í kennslustofum eru: 2.bekkur, 5.bekkur, 6.bekkur, 8.bekkur, 9.bekkur og 10.bekkur. Matarvagnar munu fara í kennslustofur með áhöldum og mat og munu nemendur matast við sín borð. Frímínútur munu verða með hefðbundnum hætti. Það liggur fyrir að til þess að þetta skipulag gangi upp þurfum við öll að leggja okkar að mörkum við að hádegisstundin verði endurnærandi fyrir alla og það takist að láta þetta allt rúlla. Þar er lykilatriði að fylgja fyrirmælum starfsmanna og sýna þolinmæði Skólinn mun nú verða lokaður gestum og þar með töldum foreldrum og forráðamönnum, nema í samráði við skólastjóra Nemendur eiga ekki að koma í skólann ef þeir finna fyrir covid líkum einkennum en fara í einkennasýnatöku við fyrsta tækifæri. Ef þróun faraldursins verður áfram á þeim nótum sem verið hefur undanfarinn mánuð, má reikna með að aðlaga þurfi skólastarfið að stöðunni hverju sinni og jafnvel að fella niður kennslu. Foreldrum verður tilkynnt ef upp koma smit og haft samband við þá beint eftir atvikum ef nemendur þurfa að fara í sóttkví. En við vonum að okkur takist að halda skólastarfinu sem lengst á hefðbundnum nótum. Við leggjum áfram áherslu á persónulegar sóttvarnir og þrif í skólanum. Ef barn sýnir einkenni skal það vera heima og fara í próf áður en það mætir í skólann. Samkvæmt reglugerðinni skulu foreldrar eða aðstandendur almennt ekki koma inn í skólabyggingar án sérstaks leyfis og skulu þá bera grímur. Við vonumst eftir góðu samstarfi við foreldra og nú sem fyrr er brýnt að standa saman, þvo og spritta. Við í skólanum horfum björtum augum fram á nýtt ár og tökumst á við þessa óvissu stöðu með jákvæðni og vonum að allt fari hér á besta veg.

Starfsfólk Egilsstaðaskóla óskar nemendum, foreldrum og öðrum velunnurum skólans gleðilegra jóla og gæfuríks árs. Nemendur mæta aftur hressir í skólann 4. janúar. Skrifstofa skólans verður lokuð frá 20. des til 3. jan.

Jólaskemmtanir skólans verða föstudaginn 17.desember frá 10:00-12:00 fyrir alla árganga skólans. Dagurinn er skertur dagur samkvæmt skóladagatali, sem þýðir að skólahald er skemmra en stundaskrá segir til um. Árgangar halda jólastundir í sínum stofum, en 1.-3.bekkur mun jafnframt fá tækifæri til að dansa í kringum jólatré í matsal skólans, hver árgangur fyrir sig við undirleik kennara Tónlistarskólans. 6.bekkur mun sýna jólasöguna og munu 1.-6.bekkur horfa á hana rafrænt að þessu sinni. Nemendur í 8.-10.bekk munu frumsýna jólalagamyndbönd sem bekkirnir hafa verið að vinna undanfarið, auk jólalagamyndbands kennara á elsta stigi. Umsjónarkennarar munu senda út nánari upplýsingar um fyrirkomulag í hverjum árgangi. Aðeins verður hádegisverður fyrir nemendur í Frístund þennan dag. Skólaakstur verður miðað við þessa tímasetningu. Frístund er opin þennan dag og þarf að skrá þá nemendur sem nýta aukatíma hjá forstöðukonu. Jólaleyfi nemenda hefst síðan 20.desember. Mánudagurinn 3.janúar er starfsdagur og skólastarf nemenda hefst samkvæmt stundaskrá þriðjudaginn 4.janúar 2022. Fimmtudaginn 16.desember verður jóladagur í skólanum og eru nemendur og starfsmenn hvattir til að skarta jólalegum fatnaði eða fylgihlutum í tilefni dagsins. Þann dag er hangikjöt á matseðlinum, en skólastarf hefðbundið.

Laugardaginn 23. október sl. var útför Birnu Bjarkar Reynisdóttur kennara við Egilsstaðskóla. Birna Björk hóf störf við Egilsstaðskóla haustið 2002 og starfaði sem umsjónarkennari á elsta stigi. Minningarorð skólastjóra.