Fréttir

Krakkarnir í 1. og 2. bekk héldu síðustu árshátíð vetrarins þegar þau sýndu Dýrin í Hálsaskógi í vikunni. Eins og ávallt koma fjölmargir að undirbúningi og framkvæmd árshátíða því þau eru mörg handtökin. Tónlistarskólinn á Egilsstöðum sá um tónlistarflutning og Margrét Lára æfði og stjórnaði söngatriðum. Nemendur úr 7. bekk voru fengnir til að stjórna hljóði og ljósum og sömuleiðis aðstoðuðu nemendur úr 7. bekk við að mála leikarana. Að venju komu þau Hjalti Stefánsson og Heiður Ósk Helgadóttir og tóku sýninguna upp. Hægt verður að kaupa USB lykil með sýningunni á síðar í vetur. Nemendur og starfsfólk Egilsstaðaskóla þakkar öllum þeim sem hafa aðstoðað við uppsetningar á árshátíðum vetrarins og gestum sem hafa komið á sýningarnar.

Krakkarnir í 3. og 4. bekk sýndu Dýrin í Hálsaskógi á árshátíð sinni. Það var mikill spenningur í hópnum en allir stóðu sig með mikilli prýði á sýningunni. Kennarar og nemendur í Tónlistarskólanum á Egilsstöðum tóku þátt í sýningunni með því að spila undir í sönglögunum. Margrét Lára Þórarinsdóttir tónlistarkennari æfði sönghópana og Berglind Halldórsdóttir stjórnaði hljómsveitinni. Meðfylgjandi eru myndir úr Hálsaskógi.

Í dag er þriðja árshátíð skólaársins þegar nemendur í 3. og 4. bekk sýna Dýrin í Hálsaskógi. Það er ekki selt inn á árshátíðir í Egilsstaðaskóla en gestum er boðið að leggja til frjáls framlög sem hafa runnið í sviðslistasjóð skólans. Á þessu skólaári og því síðasta hefur verið hægt að kaupa hljóðnema, bæði lausa og á gólf, auk monitora sem eru notaðir á sýningum og viðburðum í skólanum. Það munar sannarlega um þessa viðbót í tækjakost skólans og við erum afar þakklát fyrir þessi framlög gesta sem koma að góðum notum.

Þessa dagana æfa krakkarnir í 3. og 4. bekk stíft fyrir árshátíðina sína sem verður 6. mars. Það eru Dýrin í Hálsaskógi sem eru sett á svið að þessu sinni. Það er að mörgu að hyggja þegar leikrit eru sett upp á árshátíðum og margir sem koma að fjölbreyttum verkefnum. Eitt af því sem þarf að vera í Dýrunum í Hálsaskógi er tré á sviðið. Það var hannað og smíðað í sameiningu af Óttari Steini smíðakennara og nemanda af miðstigi. Tréð tekur sig vel út sem miðpunkturinn í sviðsmyndinni.

Í dag er ekki hefðbundinn skóladagur heldur koma nemendur með foreldrum og forráðafólki sínu til að ræða saman um starfið í skólanum, sýna verkefni sem þeir hafa unnið og geta spjallað við umsjónarkennara sem eru til taks. Það er alltaf gaman að fá foreldra og forráðafólk í skólann og gaman að fylgjast með krökkunum sýna verkefnin sín og segja frá því sem þau eru að fást við í skólanum. Þess utan gefst tækifæri hjá starfsfólki skólans til að sinna ýmsum verkefnum, sem ekki gefst tími til að vinna á öðrum tímum. Það þarf að taka til, flokka dót, undirbúa fyrir leikmyndagerð, flokka lestrarbækur, plasta bækur á bókasafni og margt fleira gagnlegt.

Skólastarf var óhefðbundið í dag, á öskudaginn. Vinabekkir hittust og unnu ýmis verkefni saman; Það var dansað, spilað, puttaprjónað, spilað blöðrubadminton og margt annað skemmtilegt. Þegar dagskrá vinabekkjanna lauk fóru yngri nemendur í íþróttahúsið á samkomu sem Foreldrafélag Egilsstaðaskóla skipulagði en 5. - 10. bekkingar voru áfram í skólanum og skemmtu sér saman. Skóladegi lauk um hádegi og þá þyrptust nemendur út til að fara um bæinn og syngja. Vetrarfrí hefst svo á morgun og nemendur koma í skólann þriðjudaginn 20. febrúar.

Það er fallegur og góður boðskapur í leikritinu Ávaxtakarfan, sem nemendur í 5. - 7. bekk sýndu á árshátíð sinni í vikunni. Allir eiga jafnan rétt og eru jafn mikilvægir hvort sem þeir eru ávextir, ber eða ávextir! Undirbúningur árshátíðarinnar hefur staðið í nokkrar vikur og fyrst og fremst i höndum umsjónarkennara. Aðrir hafa þó lagt hönd á plóg enda er margt sem þarf að hafa tilbúið þegar svo viðamikil sýning er sett á svið. Kennarar saumuðu búninga, húsvörður aðstoðaði við gerð sviðsmyndar, list- og verkgreinakennarar komu að gerð sviðsmyndar auk þess sem starfsfólk skólans aðstoðaði nemendur við að læra á og stjórna hljóði og ljósum. Kennarar við Tónlistarskólann á Egilsstöðum mynduðu hljómsveit sem spilaði undir í nokkrum lögum ásamt því að hafa æft krakkana í sönglögum. Það er mikill lærdómur fyrir alla að taka þátt í að setja leikrit á svið og oft reynir á í undirbúningsferlinu. Við erum afskaplega stolt yfir því hve vel krakkarnir stóðu sig á sýningunni. Meðfylgjandi eru myndir sem starfsfólk tók á sýningunni en líka myndir sem Unnar Erlingsson tók á generalprufu og leyfði okkur að nota fyrir heimasíðuna.

Í Egilsstaðaskóla er hefð fyrir svokallaðri 100-daga-hátíð fyrir nemendur í 1. bekk. Þá er haldið upp á það að krakkarnir hafa verið í skólanum í 100 daga. Hátíðin var undirbúin með því að búnar voru til veifur og skrifað á 100 hjörtu það sem krakkarnir hafa lært þessa fyrstu 100 daga. Hjörtun mynda töluna 100 á veggnum fyrir framan stofur 1. bekkjar. Í litlum hópum voru gerðar tilraunir með að skrifa 100 orð á blað. Krakkarnir útbjuggu medalíur sem á stóð „100 dögum klárari“ og skreyttu með einum tug af perlum. Á hátíðinni sjálfri mátti koma með dót að ósk hvers og eins. Þá teiknuðu krakkarnir mynd af sér þegar þau væru orðin 100 ára og skrifuðu þrennt sem þau ætla að vera búin að gera þegar þau verða 100 ára. Það voru búin til 100 skrímsli og síðast en ekki síst fengu allir að telja sér 10 einingar af 10 tegundum af góðgæti í poka, sem þau gæddu sér á yfir bíómynd í lok dags.

Nemendur í 3. bekk hafa síðustu daga verið að fræðast um og vinna með ísbirni. Þetta samþætta verkefni fellur undir Byrjendalæsi þar sem unnið er með hæfniviðmið sem falla undir íslensku, náttúru- og samfélagsfræði og er bókin Ísbjörn (  https://mms.is/namsefni/milli-himins-og-jardar-isbjorn-rafbok ) lögð til grundvallar. Meðal þess sem nemendur hafa gert er æfa sig í lestri fræðitexta og svara spurningum úr textanum, semja ljóð og gera myndasögu sem lýsir lífsháttum ísbjarna. Stærsta verkefnið var þó að teikna upp ísbirni og barn í raunstærð.