Fréttir

Það eru margar aðferðir sem við getum nýtt okkur við nám. Í 8.bekk undirbjuggu nemendur sig fyrir próf í stærðfræði með því að búa til hugarkort/"svindlmiða" sem þau máttu hafa með sér í prófið. Þetta er góð leið til að rifja upp og sjá fyrir sér leiðir. Það voru gerð mörg falleg hugarkort við þessa upprifjun sem nýttust vel þeim sem höfðu undirbúið sig með þessum hætti.

Nemendur á yngsta stigi, í 1. - 4.bekk æfa nú leikritið Emil í Kattholti, sem sýnt verður á árshátíðum 7. og 9.febrúar nk. Mikill undirbúningur er vegna uppsetningarinnar enda þarf að hanna leikmynd, finna búninga, æfa söng og margt fleira ásamt því auðvitað að æfa leikritið. Tímasetningar árshátíðanna er sem hér segir: Árshátíð 1. og 2. bekkjar 7. febrúar - kl. 17.00. Árshátíð 3. og 4.bekkjar 9. febrúar - kl. 17.00 Öðrum árgöngum er boðið á generalprufur sama morgunn og árshátíðarnar eru.

Krakkarnir í 9.bekk kynntu verkefni sín um íslenskar eldstöðvar fyrir skömmu. Verkefnið var unnið í samfélagsfræði, samþætt með íslensku, þar sem krafa var gerð um heimildaskrá. Byrjað var að vinna í verkefninu í nóvember og var krökkunum frjálst að velja framsetningu. Verkefnin tóku því á sig ýmis form; bækur, plaköt, líkön o.fl. Kynningin fór fram inni í bekk og var gaman að sjá hve fjölbreyttar leiðir krakkarnir völdu sér og heilmikill fróðleikur sem þau höfðu tekið saman um eldstöðvar á Íslandi.

Á morgun, föstudaginn 20.janúar, er Bóndadagur. Við ætlum að halda upp á daginn með því að klæðast lopapeysum, ullarsokkum eða öðru sem minnir á hvaða dagur er. Í hádegismatnum verður boðið upp á þorramat, hangikjöt og súrmat og meðlæti.

Starfsfólk Egilsstaðaskóla óskar nemendum, foreldrum og öðrum velunnurum skólans gleðilegra jóla og gæfuríks árs. Nemendur mæta aftur í skólann 4. janúar. Skrifstofa skólans verður lokuð frá 21. des til 3. jan. Þriðjudagurinn 3. janúar er starfsdagur í skólanum og Frístund lokuð. Skólastarf nemenda hefst samkvæmt stundaskrá á nýju ári miðvikudaginn 4. janúar.

Það er að mörgu að huga við undirbúning jólaskemmtana, sem verða í kvöld og í fyrramálið. Vaskur hópur starfsmanna bar jólatréð inn í morgun en við notum fallega útitréð okkar sem innitré við þessi tækifæri. Í dag mun nemendaráðið skreyta tréð og því verður komið fyrir í matsal skólans svo hægt sé að dansa í kringum það á síðasta skóladegi ársins 2022.

Fyrir jólin hafa um 180 nemendur úr Egilsstaðaskóla heimsótt Minjasafn Austurlands í sérstökum jólaheimsóknum. Af þessum 180 voru um 140 á yngsta stigi (1.-3. bekkur) og 40 af miðstigi (7. bekkur). Nemendur á yngsta stigi fengu fræðslu um jólasveinana og þá hluti og athafnir sem þeir draga nöfn sín af. Þá var nemendum einnig boðið að kíkja inn í Grýluhellinn sem birtist á safninu núna fyrir jólin. Nemendum á miðstigi var boðið upp á stutta sögustund þar sem fjallað var um ýmsar þjóðsögur og fleira sem tengist jólunum. Nemendur og starfsfólk Egilsstaðaskóla þakkar Minjasafninu fyrir ánægjulegt samstarf, nú sem endranær.