Fréttir

Vegna veðurs og færðar verður allt skólahald í Egilsstaðaskóla fellt niður í dag, mánudaginn 27. mars.

Héraðshátíð Stóru upplestrarkeppninnar fór fram í Egilsstaðaskóla miðvikudaginn 15. mars í 27.skipti. Tíu nemendur í sjöunda bekk, úr fimm skólum á Austurlandi – norðursvæði, höfðu unnið sér inn þátttökurétt á hátíðinni. Undirbúningur fyrir keppnina hefur hafist á Degi íslenskrar tungu þann 16. nóvember en hann felst í að nemendur æfa upplestur og framsögn á bæði bundnu og óbundnu máli. Nemendur komu því vel undirbúnir og lögðu mikinn metnað í flutning sinn. Textarnir, sem lesnir voru að þessu sinni, eru úr bókinni Blokkin á heimsenda eftir Arndísi Þórarinsdóttur og Huldu Sigrúnu Bjarnadóttur. Ljóðin eru eftir Aðalstein Ásberg Sigurðsson en auk þess velja keppendur eitt ljóð að eigin vali. Þrír dómarar meta keppendur á lokahátíðinni en til þeirra verka er fengið fólk sem hefur bakgrunn sem nýtist þeim við að meta framlag barnanna. Það var vandasamt að velja þau þrjú sem hlutu fyrstu sæti keppninnar en niðurstaðan var sú að Jóhann Smári Kjartansson hlaut fyrsta sæti, Baldur Jarl Fjölnisson annað sæti og Sofija Una Kruze Unnarsdóttir þriðja sætið. Jóhann Smári og Baldur Jarl eru nemendur í Egilsstaðaskóla og Sofija Una í Seyðisfjarðarskóla. Jarðþrúður Ólafsdóttir kennsluráðgjafi hjá Skólaþjónustu Múlaþings hefur haldið utan um framkvæmd keppninnar Á Austurlandi um árabil en keppnin er skipulögð og undirbúin af Röddum, samtökum um vandaðan upplestur og framsögn.

Árlega koma slökkviliðsmenn í heimsókn í 3.bekk og fræða þau um eldvarnir. Krakkarnir taka þátt í eldvarnargetraun Landssambands slökkviliðsmanna og í dag komu slökkviliðs-og varaslökkviliðsstjóri Múlaþings í 3.bekk og afhentu verðlaun fyrir eldvarnargetraun, sem fór fram fyrir jól. Vinningshafinn er Katrín Þöll Skarphéðinsdóttir og við óskum henni til hamingju með vinninginn.

Sólborg Guðbrandsdóttir og Þorsteinn V. Einarsson heimsóttu okkur í gær og fluttu alls 3 fyrirlestra fyrir nemendur í 7.-10.bekk og fyrir foreldra og aðra áhugasama um mörk, samskipti og karlmennsku. Þau Sólborg og Þorsteinn hafa ferðast víða um land til að spjalla við krakka og foreldra með það að markmiði að stuðla að uppbyggilegra jafnréttissamfélagi með því að hrista upp í viðteknum samfélagslegum normum og hugmyndum. Bæði Sólborg og Þorsteinn halda úti Instagram síðum þar sem þau vekja athygli á ýmsu sem tengist m.a. stafrænu kynferðisofbeldi og viðteknum hugmyndum um karlmennsku. Nánar er hægt að kynna sér efnið á Instagramsíðunum Fávitar og Karlmennskan.

Nemendur á unglingastigi héldu þorrablót sitt fimmtudaginn 2.mars. Nemendaráð annaðist undirbúning dagskrár og sá um skreytingar. Að loknu borðhaldi tóku við skemmtiatriði. Nemendur í 10.bekk gerðu myndband þar sem þeir gerðu stólpagrín að kennurum sínum og starfsfólki unglingastigsins en auk þess var farið í leiki og nemendur og starfsfólk sýnd í spéspegli. Umsjónarkennarar 10.bekkjar enduðu svo skemmtidagskránna með árlegum pistli um útskriftarnema, sem margir höfðu beðið spennir eftir. Upp var settur glæsilegur myndaveggur og margir nýttu sér að stilla sér upp með vinum og bekkjarfélögum til myndatöku. Allir voru til fyrirmyndar og ekki annað að sjá en krakkarnir skemmtu sér vel. 

Í morgun komu nemendur í 10.bekk ásamt foreldrum snemma í skólann til að skipuleggja og keyra út bollur í fyrirtæki á svæðinu. Það er áralöng hefð fyrir því að krakkarnir selja bollur til fjáröflunar fyrir skólaferðalagið sitt. Þar sem ekki er lengur bakarí á staðnum var samið við Sesam brauðhús á Reyðarfirði um að fá bollur frá þeim. Sett var upp dreifingarmiðstöð í matsal skólans og þaðan keyrt út. Margir mega því eiga von á glænýjum bollum með kaffinu í dag.

Við viljum benda á áhugaverðan Zoom fund forvarnarhópsins "Náum áttum, um börn og samfélagsmiðla, miðvikudaginn 15. febrúar n.k. Skráning fer fram á www.naumattum.is og nauðsynlegt er að skrá sig til þess að fá linkinn á fundinn sendan. Kveðjur frá stjórn foreldrafélagsins

Nemendur í 8. bekk Egilsstaðaskóla tók þátt í alþjóðlegri nýsköpunarkeppni fyrir ungmenni á aldrinum 13-19 ára. Keppnin heitir The Earth Prize og hófst fyrir áramót og lauk í lok janúar. Keppnin fór eingöngu fram á netinu og í henni voru ungmenni frá öllum heiminu. Nemendur horfðu á mörg fræðslumyndbönd af heimasíðu keppninnar þar sem þeir lærðu um margvísleg umhverfismál, hlustuðu á frumkvöðla segja frá sinni vinnu og hvernig lítil hugmynd getur orðið að veruleika ef rétt er haldið á spilunum. Í framhaldinu fóru þeir í það að hanna eitthvað sem gæti mögulega nýts í baráttunni gegn hlýnun jarðar. Hægt var að panta Zoom-samtal við kennara á vegum keppninnar og fá hjálp við úrfærslu á hugmyndavinnu en nemendur okkar nýttu sér það ekki að þessu sinni. Markmið þeirra með verkefninu var að “solve the unthingable”. Nemendum var skipt í hópa og byrjuð þeir að hugstorma um það hvar vandinn lægi og hvernig hægt væri að laga hann. Hugmyndirnar voru mjög fjölbreyttar og gaman að fylgjast með því hvernig þær þróuðust í hverri viku sem leið. Á næstunni kemur í ljós hvort að einhverjir nemendur komast áfram í keppninni en þá þurfa þeir að útfæra hugmynd sína enn frekar. Peningaverðlaun eru fyrir bestu hugmyndina sem hvatti nemendur heldur betur til dáða.

Í vikunni voru árshátíðir 1.-2.bekkjar og 3. - 4.bekkjar. Emil í Kattholti mætti á sviðið, ásamt Ídu systur sinni, foreldrum og öllu þeirra fólki. Alls tóku 187 börn þátt í sýningunum tveimur og fjöldi starfsmanna aðstoðaði við uppsetninguna. Kennarar og nemendur í Tónlistarskólanum á Egilsstöðum sáu um tónlistarflutning og stjórn í söngatriðinum. Báðar árshátíðir voru afar velheppnaðar og gleði flytjenda mikil enda heilmikil vinna að baki sýningum sem þessum. Við þökkum þeim, sem komu á sýningarnar, fyrir komuna.